Atebidades

Passar la tarde ou la manhana de ruoda de l forno. Fazer la massa de l pan, ponê-la a drumir na masseira, punê-la a cuzer ne l forno, sacá-la i pur fin prubar l pan calantico cun manteiga ou fazer sopas de cabalho cansado.

Depandendo de la staçon de l'anho, hai muitas cousas que se fazen ne l campo. Na primabera ampeça-se a poner la hourta, pra ne l berano culher las hortaliças. Ne l berano fai-se la segada, apanhan-se ls fardos, las batatas i pur fin ya durante l'outonho apanhan-se las bóbidas. Ne l'outonho fai-se la bandima, la marmelada i cuompotas bariadas. Ne l ambierno fai-se la matancia de l cochino i l fumeiro. Ne l fin de l' ambierno puodan-se las árbles de fruto i la binha (cun arame i parreira simples).

Caminada pula aldé eidentificando puontos d'anterés i falando an Mirandês.

Ida a la loija a ber ls burros mirandeses, lhebalos al cerrado, pudendo scuba- los, peinalos i dar-le a quemer na loija.

Ir al polheiro tirar uobos frescos de l nialeiro i dar de quemer a las pitas i als piticos.

Nesta atibidade puode-se degustar i ber cumo se fazie ua refeiçon a la moda antiga. Antigamente, era habitual fazer l quemer al lhume ne l pote de fierro. Hai oupçon begetariana se houbir anformaçon prébia.